DARA

Moltar sa CO gan ainmfhocal sa tuiseal ginideach a infhilleadh tar éis dara: mac an dara bean, mac an dara fear. Ceadaítear foirmeacha mar cuid an dara mic agus bás na dara mná in FGB, áfach, agus is léir an dá nós – ainmneach agus ginideach – a bheith sa Ghaeilge.

Botún an-choitianta is ea ainmfhocail a shéimhiú i ndiaidh dara:

Is í seo an dara bhliain is fiche as a chéile go bhfuil Éigse na Brídeoige á reáchtáil ag Comhchoiste Ghaeltacht Uíbh Ráthaigh. (an dara bliain)

Ní shéimhítear i ndiaidh dara fiú má dhéantar an t-ainmfhocal a infhilleadh: tús an dara seimeastair.

Leaganacha malartacha is ea darna agus tarna.