Ní furasta dealú idir oiread agus méid. Go minic, nuair is toirt nó líon is brí don dá fhocal, is féidir iad a mhalartú ar a chéile. Is ionann brí do Déarfaidh mé an méid seo leat agus Déarfaidh mé an oiread seo leat. Ach is minic a bhíonn gné chomparáideach i gceist le oiread:
- Dá dtabharfainn sin agus an oiread eile, ó ní raibh mo phas le fáil agam. (Is é sin, an méid a tugadh agus an méid chéanna anuas air sin.)
- Níl a oiread clú airsean agus atá ar a dheartháir.
- Tá a sheacht n-oiread ann. (Is é sin, seacht n-uaire níos mó.)
Ní fhéadfaí méid a chur in áit oiread in abairt ar bith acu sin.
Féach chomh maith mar a úsáidtear oiread sna habairtí seo:
- Bhí oiread oilc ar na heagraíochtaí faoin ráiteas úd gur éiligh siad go dtarraingeofaí siar é.
- Go deimhin, bhí oiread muiníne ag a bhainisteoir Ger Loughnane as, gur roghnaigh sé uair amháin Brian a fhágáil ar an bpáirc agus é leonta.
Sa dá shampla sin, tá oiread i dtús na habairte (an príomhchlásal). Leanann clásal eile (an clásal iarmhartach) a mhíníonn an toradh a bhí ar pé faisnéis atá luaite sa phríomhchlásal. Arís, ní fhéadfadh méid a chur in áit oiread sna habairtí samplacha thuas.
Botún coitianta a dhéantar in abairtí den chineál seo ná an méid sin a scríobh seachas oiread. Ní bheadh aon locht air sin dá mbeadh méid áirithe luaite cheana:
D’iarr sé céad euro orm ach ní raibh an méid sin airgid agam.
Ach níor cheart an struchtúr sin a úsáid i gcás nach bhfuil an méid luaite cheana.
- Tá an méid sin míthuisceana ann gur shocraíomar suirbhé simplí a eagrú.
- Ó am go chéile, ámh, bíonn an méid sin fuatha ag daoine don sealbhóir go dteipeann air sa toghchán.
Is mar seo ba cheart na habairtí sin a athscríobh:
- Tá an oiread sin míthuisceana ann gur shocraíomar suirbhé simplí a eagrú.
- Ó am go chéile, ámh, bíonn an oiread sin fuatha ag daoine don sealbhóir go dteipeann air sa toghchán.