Is furasta don Bhéarlóir péire réamhfhocal (nó níos mó ná sin) a chur roimh ainmfhocal gan cur as do chiall ná do chruinneas na habairte:
- Trains to and from Dublin.
- With or without an appointment.
Ní oireann an múnla sin go rómhaith don Ghaeilge.
- Le nó gan choinne.
- Traenacha go agus amach as Baile Átha Cliath.
- Ba cheart tacaíocht do, nó easaontas le, gluaiseachtaí polaitiúla a chur in iúl go síochánta, stuama.
Tá roinnt bealaí ann chun a leithéid d'abairt a scríobh i nGaeilge. Is féidir, mar shampla, forainm a úsáid:
Traenacha go Baile Átha Cliath agus amach as.
Nó is féidir an t-ainmfhocal a athrá:
Le coinne nó gan choinne.
Nó dul i muinín struchtúr eile ar fad:
- Bíodh coinne agat nó ná bíodh.
- Is go síochánta stuama ba cheart tacú nó easaontú le gluaiseachtaí polaitiúla.
Luaigh Séamas Daltún (Maidir le do Litir: 75) eisceacht air sin, is é sin an réamhfhocal comhshuite agus na réamhfhocail shimplí a leanann an tuiseal ginideach iad, mar shampla Bhí sé i mbun, i mbarr, agus i lár an achrainn.
Is minic a chuirtear faisnéis réamhfhoclach i ndeireadh na habairte Gaeilge, bíodh is go raibh sí in áit eile ar fad san abairt Bhéarla:
An age-appropriate, clean and safe work surface.
Dromchla oibre atá glan, sábháilte agus oiriúnach don aoisghrúpa lena mbaineann.